«Ақжайық» футбол клубы базасында 23-25 наурыз күндері футболдан 2007-2008 жылдары туылған балалар арасында Наурыз мерекесіне орай ұйымдастырылған турнир өтті. Спорттық шараға облыс аудандарынан және «Ақжайық» балалар футболы орталығынан барлығы 8 команда қатысқан болатын. Жарыс қортындысы бойынша үшінші орынды «Ақсай» командасы иеленсе, екінші орынға «Ақжайық-2» командасы табан тіреді. Бас жүлде және «Наурыз кубогы» «Ақжайық-2007» командасының балғындарына бұйырды. Сонымен қатар үздік қақпашы Қайрат Болатов («Ақжайық-2007»), үздік қорғаушы Әмір Жақыпов («Ақсай»), үздік шабулышы болып Мерлан Ғабдол («Ақжайық-2») таңылды. Жеңімпаздар мен жүлдегерлерді «Ақжайық» футбол клубының директоры Казиханов Азат Тағбергенұлы марапаттады.

«Ақжайық» футбол орталығының меңгерушісі В.Кабловтың айтуы бойынша бұндай жарыстар шалғай аудандағы талантты балаларды анықтауға мүмкіндік береді екен. Мысалы:  2016 жыл қортындысы бойынша аудандардан көзге түскен 14 балғын футболшы «Ақжайық» футбол орталығына қабылданған. Ал төрт футболшы Өскемен, Шымкент  қалаларында жасақталған футбол академиясына шақырту алып, оқуға қабылданған.

Биылғы жылы орталық тәрбиеленушілерінен (1999-2005 жылдары туылғандар) құралған 7 топ Қазақстан Республикасының біріншілігіне бақ сынауда.